كلمة المهندس نجيب ساويرس في المؤتمر الصحفي لمهرجان الجونة 2025
أكد المهندس نجيب ساويرس في كلمته بالمؤتمر الصحفي لمهرجان الجونة 2025 على نجاح المهرجان في دوراته السبع السابقة وصرح:”من أول يوم حلمنا يكون عندنا مهرجان بمعايير عالمية، يجمع بين الفن، الثقافة، والحوار. ومع كل دورة، بيكبر الحلم ويتأكد إن السينما قادرة تغيّر، تلهم، وتفتح أبواب جديدة للتواصل بين الناس. شعارنا “سينما من أجل الإنسانية” هو التزام مستمر. في عالم مليان صراعات وتحديات، السينما بتفضل وسيلة قوية علشان نرفع الوعي، نحتفل بالأمل، ونلقي الضوء على القضايا اللي بتمس حياة البشر في كل مكان”.
ويضيف:”السينما بالنسبة لينا هي فن بيعكس الواقع ويعيد صياغته من زاوية مختلفة. وفي مهرجان الجونة، بنسعى دايما نوفر مساحة لكل المواهب، إنهم يلاقوا فرصة يعبروا بيها عن نفسهم ويتواصلوا مع العالم. وأنا دايمًا بكون فخور لما أشوف أسماء عربية بتلمع في مهرجانات دولية كبيرة زي “كان” و”فينيسيا”. والفخر بيبقى أكبر لما أعرف إن بعض الأسماء دي كانت بدايتها من الجونة”.
وفي الختام:”حابب أكد على أن المهرجان ساهم في خلق فرص عمل، ودعم صناعة السينما اللي هي جزء من الاقتصاد الإبداعي اللي بيعتمد على المواهب. وده بيأكد إن الاستثمار في الفن ليس رفاهية، لكنه عنصر أساسي من عناصر التنمية.
بشكركم على حضوركم ودعمكم، وبتمنى أن الدورة دي تكون تجربة مميزة وملهمة لكل واحد فيكم، وتضيف خطوة جديدة في مشوار السينما العربية والعالمية”.
اقرؤوا أيضًا: