عمرو منسي يعلن عن شراكات محلية وعالمية ومكان جديد في الجونة 2025
استهل المدير التنفيذي لمهرجان الجونة السينمائي عمرو منسي في المؤتمر الصحفي لمهرجان الجونة 2025 كلمته:”أنا مبسوط جدًا إننا في المؤتمر الصحفي للدورة الثامنة من مهرجان الجونة السينمائي، ومتحمس كمان إننا نكمل نجاح السنين اللي فاتت. النجاح ده بيخلينا نفكر دايمًا: إيه الجديد اللي ممكن نقدمه؟”.
واستكمل:”المهرجان مع الوقت أصبح مساحة أمل لكل المواهب والشباب، وبقى مكان بيجمعنا حوالين فكرة واحدة وهي: قد إيه الفن يقدر يغير. وعلى مدار الدورات السابقة، مهرجان الجونة أثبت إنه رقم مهم على خريطة المهرجانات في المنطقة والعالم، وده بفضل تأثيره الكبير في صناعة السينما. المهرجان مش بيكتفي بعرض أهم أفلام السنة من كل أنحاء العالم، لكنه كمان من خلال منصة “سيني جونة” بيحقق هدفه الأساسي: إتاحة الفرص للشباب وصناع السينما إنهم يعرضوا مشاريعهم على شركات إنتاج وتوزيع وجهات داعمة. والأجمل إن كل ده بيتم في مكان واحد هو الهاب، اللي أنا سعيد جدًا بنجاح فكرته واستمراره، لأنه سهّل حركة ضيوف المهرجان وقرّبهم من بعض”.
عمرو منسي يكشف عن جديد المهرجان في 2025
أعلن عمرو منسي عن أحدث مواقع فعاليات المهرجان “مسرح الجزيرة” الذي يعتبر مساحة إضافية للجمهور في قلب مدينة الجونة. سيستضيف المسرح ورش عمل وندوات، وأيضًا لقاءات برنامج سيني جونة.
وأوضح أن سوق سيني جونة مستمر لعامه الثالث على التوالي، حيث يصل عدد العارضين فيه لهذا العام 30 شركة من 10 دول. وأضاف:”كمان متحمس جدًا لبرنامجنا الجديد “سيني جونة لدعم المواهب الناشئة – Emerge”، اللي بيكبر سنة ورا سنة بدعم شركائنا: الاتحاد الأوروبي، ومؤسسة دروسوس، ومؤسسة ساويرس للتنمية الاجتماعية. وسعيد بالشراكة الجديدة مع جامعة إسلسكا اللي هتساهم في إتاحة فرصة أكبر للجيل الصغير من الموهوبين للمشاركة في فعاليات المهرجان”.
أما عن التغطية التلفزيونية للمهرجان والبث المباشر فصرح:”ولأننا عايزين نتيح فرصة لجمهور أوسع لمتابعة المهرجان، سعيد بالإعلان عن شراكة استراتيجية مع أم بي سي، ومنصة شاهد، وقناة النهار، لبث فعاليات الدورة الثامنة مباشرة على التلات منصات”.
شعار مهرجان الجونة 2025
وفي الختام، تناول عمرو منسي التعليق على الشعرا الرسمي لشعار العام من المهرجان:”أما عن شعار المهرجان “سينما من أجل الإنسانية”، اللي ابتداه المهندس نجيب ساويرس من الدورة الأولى، فالسنة دي بينتقل لمستوى عالمي جديد ليصبح حركة سنوية بالشراكة مع الأمم المتحدة، نسلط الضوء من خلالها كل دورة على قضية إنسانية كبرى. البداية هتكون مع محور الأمن الغذائي، خصوصًا إن افتتاح المهرجان السنة دي بيتزامن مع اليوم العالمي للغذاء”. ويستكمل:”في النهاية، أحب أشكر كل الرعاة والشركاء اللي زاد حجم تعاوننا معاهم السنة دي، وأشكر صُنّاع السينما والفنانين، وكل الإعلاميين والصحفيين. وطبعًا لازم أشكر فريق العمل اللي بيشتغل بكل إخلاص علشان كل حاجة تطلع بأفضل صورة”.
تستضيف مدينة الجونة المهرجان هذا العام في الفترة ما بين 16 إلى 24 أكتوبر المقبل، وتحل النجمة العالمية كيت بلانشيت ضيفة شرف كما وتُقلد بتكريم خاص، تعرفوا على تفاصيله:
اقرؤوا أيضًا: